थाहानगर/२२ साउन
थाहानगरमा अहिलेसम्म विभिन्न मितिमा गरेर कोभिड-१९ (कोरोना भाइरस) विरुद्धको खोप ८५७९ जनाले पाएका छन् ।

आज भेरोसेलको पहिलो डोज १८३६ ले पाएका छन् । १८ वर्ष उमेर पूरा भई अनलाइन फाराम भरेकाहरुमध्ये ८०२ जना महिला र १०३४ जना पुरुषले पहिलो डोज खोप पाएका हुन् । पछिल्लो समय आएको ३५ सय डोज खोपमध्ये आज विभिन्न स्वास्थ्य संस्थाहरुबाट खोप लगाइएको थाहानगर स्वास्थ्य शाखा प्रमुख मेघराज बलामीले बताउनु भयो । भोलि पनि विभिन्न स्वास्थ्य संस्थाहरुबाट बाकी खोप लगाइने कार्यक्रम छ ।

यस अघि आएको एक डोज लगाए पुग्ने अमेरिकी कम्पनीको जोन्सन एन्ड जोन्सन ४२० डोज मौज्दात छ । ती खोप भने बैदेशिक रोजगारीमा जानेहरुका लागि प्राथमिकतामा राखिएको छ । 

अहिलेसम्म थाहानगरमा कोभिशिल्डको पहिलो डोज १६१० जनाले पाएका छन् । भेरोसेलको पहिलो डोज आजसमेत गरी ५०१७ जनाले पाएका छन् भने भेरोसेलको दोस्रो डोज ४२८ जनाले पाइसकेका छन् । कोभिशिल्डको दोस्रो डोज १४४ जनाले पाएका छन् भने १३८० जनाले जोन्सन एन्ड जोन्सन पाएका छन्  । 

अब अनलाइन फाराम भरी माग गरे अनुसार खोप उपलब्ध हुँदै जाने र क्रमिक रुपले सबै नागरिकले खोप पाउने स्वास्थ्य शाखाले जनाएको छ । खोपको पहिलो डोज जहाँबाट लगाएको भएपनि दोस्रो डोज भने खोप लगाएको कार्ड साथमा लिएर जहाँबाट लगाए पनि मिल्ने स्वास्थ्य विभागले जनाएको छ ।

यसैबीच, शुक्रबारसम्म थाहानगरमा कोरोना संक्रमितको संख्या १०८३ पुगेको छ । तीमध्ये १९० जना सक्रिय संक्रमित छन् । सक्रिय संक्रमितमध्ये १७३ जना होम आइसोलेसनमा, ५ जना बज्रबाराही आइसोलेसनमा र १० जना विभिन्न अस्पतालहरुमा उपचाररत छन् ।

थाहानगरमा अहिले सबैभन्दा धेरै १ नम्बर वडामा ५१ जना, ३ मा ४६ जना, ६ मा ४५ जना र ४ मा १७ जना छन् । अन्य वडाहरुमा संक्रमण दर घट्दै गएको तथ्यांकले देखाएको छ । तथापि, बाइरोड न्युजको सर्वेक्षण अनुसार अधिकांश बिरामीहरु कोरोना परिक्षण नगरी मिडिकलबाट कोरोना कै औषधि किनेर खाने गरेको पाइएको छ । 

केही संक्रमितहरु खुल्ला रुपमा बजारमा डुल्ने समेत गरेका छन् । तस्वीर: फाइल